كبرتي,بس على قلبي

كبرتي
مدري كم صرتي
يمكن أوّل العشرين
كبرتي
وماتغيّرتي
صرتي: زياده بس تغرين
وأنا اللي خابرك طفله
ألطف منّها ما فيه
تجي تخطف عيون الحاضرين من الملأ غفله
وتسكن في خيال العابرين من الملأ غفله

خبرتي
يوم أكتبّك قصيده تشبهك مرّه؟
بريئه : مثل نظراتك
جريئه: مثل ضحكاتك
أبيها ترضي غرورك, وأبي ياحلوه تنبهرين

كبرتي والله يانسرين
ولاعدتي مثل أوّل : من أبسط كلمه أتطّيرين
ولوما تلامس أحساسك
ولاعدتي بعدتقرين
ذبلت أكثر حروفي حزينه بحضن كرّاسك

كبرتي
مثل هذاالحب : فيني لك بدا يكبر
وصرت أشتاقلك أكثر
كبرتي وأنتي ما تدرين
كبرتي بسرعه يانسرين
وصرتي حيل مغروره
ولكن موعلى أحبابك
علىاللي علّمك أنّك على الحلوات تغترّين
على اللي علّمك قبل اللقا وشلون: تحتضرين
وتنتظرين.. مهما طوّل غيابه
على اللي علّمك فجأه على باله غلا تمرّين

كبرتي
بس على قلبي
كبرتي أو تكبّرتي؟؟
أنا و الله ما أدري
وأنتي شوفي أي وحده من الثنتين تختارين