[color=blue]الفرق بين الورم الحميد و الورم الخبيث[/color]

بسم الله الرحمن الرحيم

أعضاء بنت مصر الكرام

الحقيقة أنا فكرت في الموضوع ده لأني ماكنتش أعرف الفرق بين الورم الحميد و الخبيث وكنت بسمع ان فلان عنده ورم و اتاخد منه عينة تتحلل و بيدعي ربنا ان الورم يطلع حميد ..........طب ليه الحميد حميد وليه الخبيث خبيث

ده اللي أنا حقوله..........

أولا يعني ايه ورم؟

الورم tumor أو neoplasm هو نمو أنسجة جديدة بشكل غير طبيعي و لا يستجيب للمؤثرات الطبيعية للنمو ولا يتوقف عن النمو بعد زوال المسبب للورم يعني لو الورم حصل بسبب التعرض لاشعاع نموه مش حيقف حتي لو توقف الاشعاع

ثانيا العوامل المسببة للاورام :

الورم سواء حميد أو خبيث بيحدث نتيجة التعرض لمواد كيميائية تضر بالخلايا و تجعلها تتوقف عن أداء وظيفتها و توجه كل طاقتها للانقسام و تكوين خلايا جديدة بشكل غير منظم والمواد دي ممكن تبقي: اشعاعات منبعثة أو مواد صناعية زي السيليكون و الأسبيستوس أو تعرض زايد للهرمونات زي هرمون ال Estrogen في حالة سرطان الثدي أو ممكن يكون بسبب بعض العادات الغذائية و الأهم بسبب العوامل الوراثية ..........

نيجي بقى للفرق بين الورم الحميد و الورم الخبيث وأنا حكتب كل واحد في صورة نقط ...........

الورم الحميد Benign Tumor يتميز بالاتي :

- الورم الحميد ينمو بالتمدد و بشكل بطئ
- الورم الحميد بيبقي حواليه كبسولة من نسيج ليفي fibrous capsule أو حواليه مساحة تفصله عن النسيج اللي حواليه وبكدة استئصاله بيبقى سهل
- الخلايا المكونة للورم الحميد بتبقي خلايا عاقلة و ممكن تقوم بو ظيفتها عادي جدا
- نادرا ما يسبب الوفاة الا في حالة لو عمل ضغط على منطقة حيوية
- و أهم فرق و دة اللي بيعمل حد فاصل بين الأورام الحميدة و الخبيثة ان النوع الحميد لا ينتشر الى أماكن أخرى في الجسم


صورة لورم حميد محاط بكبسولة من نسيج ليفي
أما بقى الورم الخبيث Malignant tumor أو السرطان فهو كالاتي :

-ينمو بسرعة و يغزو الانسجة المحيطة و عشان كدة شبههوه بالسرطان اللي هي الكابوريا يعني
- مابيبقاش حواليه لا كبسولة ولا مساحة انما بيتغلغل في الانسجة اللي حواليه و ده بيخلي استئصاله صعب و بيضطر انه يشيل أجزاء من الانسجة السليمة معاه عشان ما يسيبش أي خلايا سرطانية ممكن تنمو تاني...
-الخلايا السرطانية بتبقى مش متكونة بشكل كامل poorly developed و مالهاش وظيفة غير الانقسام و بس..
- غالبا ما يسبب الوفاة ( طبعا الاعمار بيد الله) ...
- أهم خاصية في الاورام الخبيثة هي الانتشار metastasis سواء عن طريق الاوعية و العقد الليمفاوية أو عن طريق الدم أو للانسجة المحيطة بطريقة مباشرة و غالبا الانتشار هو سبب الوفاة الاساسى ......




صورة أشعة بالصبغة بتبين الطريقة المتشعبة اللي بينمو بيها السرطان و دي صورة سرطان في الثدي

أما عن التحاليل اللي بتم عشان تشخيص نوع المرض فغالبا عن طريق أخد عينة أثناء عملية الاستئصال و فحصها سواء بالعين المجردة أو فحص مجهري للحكم على نوع الخلايا و سلوكها فلو طلع الورم حميد يبقى الحمد لله لأن ده معناه ان بمجرد التدخل الجراحي المريض شفي أما إذا كان الورم خبيث يتم الحكم عليه وو ضعه في مرحلة من أربع مراحل تبعا لخطورته و حجم الورم ووجود انتشار من عدمه.............

أصدقائي أتمنى تكونوا استفدتوا من الشرح البسيط ده لأن مرض السرطان و الاورام بصفة عامة أصبحت من أهم المشاكل الطبية في العالم كله ..........